المهندس محمد العمران الحواتمة
الوطنية مش صورة بتنزل وقت الأزمة ، ولا هاشتاغ يطلع مع الترند ، ولا جملة محفوظة نكررها وإحنا آمنين وبعيدين عن الفعل . الوطنية موقف ، والموقف إله كلفة ، واللي مش مستعد يدفعها لا يزاود على غيره .
الوطنية مش إنك تصفق لكل شيء ، ولا إنك تسكت عن الخطأ باسم المرحلة حساسة” . بالعكس ، أخطر ما يمر على الأوطان إن تتحول الوطنية لدرع يحمي التقصير ، ولسكوت جماعي مغلف بالشعارات . الوطن القوي ما بخاف من السؤال ، وما بينكسر من النقد ، اللي بينكسر هو الوهم .
اليوم صرنا نشوف وطنية موسمية ، تطلع مع الخطر وتختفي مع أول اختبار . ناس تحب الوطن بالكلام وتغيب عنه بالفعل . تكتب منشور وتنسى واجب . ترفع علم وتدوس حق . الوطنية مش استعراض ولا بطولة كلامية على حساب الحقيقة .
الوطنية الحقيقية إنك تحافظ على كرامة المواطن ، تحكي لما تشوف غلط وتوقف مع الصح حتى لو كان مكلف . إنك تفرق بين احترام الدولة وتقديس الأشخاص ، وبين الانتماء للوطن والخوف من المواجهة .
الأردن ما عاش ولا صمد بالشعارات ، عاش برجاله ونشمياته اللي حملوه مسؤولية مش ديكور . اللي بده يكون وطني عن جد ، يخدم ، يراقب ، يسأل ، ويشارك … مش بس يكتب .
بالنهاية ، الوطن ما بده بوستات .
الوطن بده ناس واقفة ، واعية ، وشجاعة. فاللهم احفظ الأردن أرضاً وقيادةً وشعباً ، واحمه من الفتن ما ظهر منها وما بطن ، واجعل هذا البلد آمناً مطمئناً قوياً بأهله ، وارزقنا صدق الانتماء وحكمة القول وشجاعة الفعل .
